ខេត្តបាត់ដំបង៖ បុរសជនជាតិអង់គ្លេសម្នាក់ត្រូវបានប្រទះឃើញស្លាប់ដោយក្បាលមានរុំចង់ដោយប្លាស្ទិច ខណៈសមត្ថកិច្ចថាជាការធ្វើអត្តឃាត។

យោងតាមរបាយការណ៍ពីសមត្ថកិច្ចបានអោយដឹងថា ករណីជនបរទេសស្លាប់ខាងលើនេះបានបង្កការភ្ញាក់ផ្អើលនៅវេលាម៉ោងប្រហែល ៩និង២០នាទី ថ្ងៃទី៣០ ខែវិច្ឆិកា ឆ្នាំ២០២២ ស្ថិតក្នុងក្រុមទី៨ ភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង ដែលសាកសពគឺជាបុរស មាអាយុ៣៤ឆ្នាំ ជាជនជាតិអង់គ្លេស និងមានមុខរបរជាគ្រូបង្រៀន។

របាយការណ៍ដដែលបានបញ្ជាក់ថា តាមការបំភ្លឺរបស់ប្រពន្ធសពឈ្មោះ វណ្ណ កញ្ចណា អាយុ ៣៩ឆ្នាំ បញ្ជាក់ថា នៅថ្ងៃទី៣០ វិច្ឆិកា ២០២២ វេលាម៉ោង ៦និង១៥នាទី ខ្លួនបានដាស់កូនអោយរៀបចំនិងជូនកូនទៅសាលារៀនចិន ចំណែកប្តីខ្លួនសុំដេកបន្ត ពេលជូនកូនដល់សាលាហើយ ខ្លួនទៅញ៉ាំគុយទាវនៅវត្តលៀប និងទៅទិញម្ហូបនៅផ្សារថ្មី លុះដល់ម៉ោង៩និង២០នាទី ខ្លួនបានមកដល់ផ្ទះបានបើកទ្វារឃើញក្បាលប្តីមានថង់ប្លាស្ទិចពណ៌ខ្មៅ ខ្លួនបានស្រាយថង់ចេញ ហើយបានធ្វើចលនាសង្កត់ទ្រូងតែប្តីខ្លួនបានស្លាប់បាត់ហើយ រួចបានតេទូរស័ព្ទប្រាប់ប្អូនថ្លៃនិងម្តាយឪពុកក្មេក។

ក្រោយកើតហេតុសមត្ថកិច្ចនិងមន្ត្រីជំនាញបានចុះទៅពិនិត្យធ្វើកោសល្យវិច័យ និងបានសន្និដ្ឋានថា ជនជាតិអង់គ្លេសខាងលើពីជាស្លាប់ដោយធ្វើអត្តឃាតយកថង់ប្លាស្ទិចចងរុំក្បាលថប់ផ្លូវដង្ហើម បន្ទាប់មកក៏បានប្រគល់សាកសពអោយសាច់ញាតិដើម្បីចាត់ចែងតាមនីតិវិធី៕